- 181 -

1352. Jan. 5. Breslau.

Herzog Wenzel giebt dem Rath die Befugniss, einen freien Brotmarkt zu Liegnitz halten zu lassen.

Wir Wenczlaw von gotis gnaden herczoge in Slesien der erste vnd herre czu Legnicz bekennen offinbar an dysem briue allen den, dy in seen adir horen lesen, daz wir haben bedacht vnd besunnen den vromen vnd dy nuczberkeyt, dy in allen steten ist vnd alle tage sich meret, wo man frienmarkt hat, beyde czu Breczlaw vnd czu der Swidnicz vnd andirswo. Dor vmme so wolle wir vnser stat Legnicz czu vromen vnd bequemelichkeyt aller armer lute, daz man do selbist czu Legnicz in vnsir stat eynen tag in der wochen frien markt habe an brote, welchen tag vnse ratlute mit den eldisten vnd den geswornen kysen, vnd sy aller beste dunket syn, dor obir, wenne wir selbir nicht volkvmelichen mogen bedenken derselben vnsir stat Legnicz vromen vnd was ir fromelich mak adir mochte werden durch andirre grosirn sachen willen, dy wir alle tage czu handen haben, dor vmme so beuele wir vnsen ratmannen der selben stat vnd beten vnd heysen sy, daz sy denken alle tage, was der selben vnsir stat Legnicz allir nuczlichst vnd fromelichst mak gesyn vnd werden an allem gerichte an allem rechte vnd an allem koufe, welchirley der mak gesyn, vnd an allen sachen, dy der stat czu eren vnd czu fromen kvmen mogen, dor czu haben sy vnsen ganczen willen, wort, gunst, geheyse vnd macht vnd haben in des vnsen brif gegeben vorsigilt mit vnsem ingesigil. Gegeben czu Breczlaw an dem obirsten abende noch gotis geburt tusunt vnd drihundirt iar in den czwey vnd fumfczegisten iare.

O. d. St. L. Nr. 74, mit Wappensiegel in rothem Wachs an Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866